*తెలుగును వెలిగించిన చిరస్మరణీయుడు బాపు గజల్ గాయకుడు మాస్ట్రో డా. గజల్ శ్రీనివాస్
*వర ముళ్ళపూడి, గిరిధర్ అరసవల్లి, హరి లకు బాపు స్మారక పురస్కారాల ప్రదానం
తన సినిమాల ద్వారా, చిత్రాల ద్వారా, కార్టూన్ల ద్వారా తెలుగును వెలిగించిన చిరస్మరణీయుడు బాపును స్మరించుకోవడం మన బాధ్యతగా భావించాలని సుప్రసిద్ధ గజల్ గాయకుడు మాస్ట్రో డా. గజల్ శ్రీనివాస్ అన్నారు. గుంటూరు, స్థానిక భారతీయ విద్యాభవన్లోని బొమ్మిడాల శ్రీకృష్ణమూర్తి ఆడిటోరియంలో ఆదివారం (14-12-2025) ఉదయం ‘బాపు-రమణ-బాలు కళాపీఠం’ మరియు ‘మల్లెతీగ’ సంయుక్త ఆధ్వర్యంలో బాపు జయంతి & బాపు స్మారక పురస్కారాల సభ జరిగింది. ఈ సభకు ముఖ్య అతిథిగా వచ్చిన డా. గజల్ శ్రీనివాస్ మాట్లాడుతూ- అందమైన స్త్రీని బాపు బొమ్మగా మనం ప్రశంసిస్తున్నామంటే అది బాపు చిత్రాలకున్న గొప్పతనమన్నారు. తెలుగువారున్నంతకాలం బాపు సినిమాలు, చిత్రాలు, కార్టూన్లు సజీవంగా వుంటాయన్నారు. తెలుగు అమ్మ ఒడి భాష కావాలన్నారు. తెలుగును అధికార భాషకంటే ముందు మన మమకార భాషగా గుర్తించాలన్నారు. అందుకు ప్రతి ఒక్కరూ కృషి చేయాలన్నారు. బాపు-రమణ-బాలు కళాపీఠం వ్యవస్థాపకులు డా. రమణ యశస్వి మాట్లాడుతూ – బాపును స్మరించుకోవడం మన అదృష్టంగా భావించాలన్నారు. స్మరణ కూడా మరణాన్ని కొంతకాలం వాయిదా వేస్తుందన్నారు. ఆత్మీయ అతిథిగా వచ్చిన సుప్రసిద్ధ రచయిత డా. యం. ప్రభాకర్ మాట్లాడుతూ-బాపు సినిమాల్లోని కొన్ని ముఖ్య సన్నివేశాల్ని, పాటల్ని గుర్తు చేసి సభకుల్ని అలరించారు. మరో అతిథి సాహితీ సమాఖ్య గుంటూరు కార్యదర్శి ఎస్.వి.ఎస్. లక్ష్మీనారాయణ బాపు ప్రతిభను తెలిపే సంగతుల్ని గుర్తు చేశారు. తొలుత మల్లెతీగ కలిమిశ్రీ అతిధుల్ని వేదికపైకి ఆహ్వానిస్తూ- బాపు దర్శకుడిగా, చిత్రకారుడిగా, కార్టూనిస్టుగా సేవలందించి తన ప్రతిభను కళా సాంస్కృతిక సంపదను రేపటి తరాలకు దాచి వుంచారన్నారు. ఈ సభలో సుప్రసిద్ధ సినీ దర్శకులు వర ముళ్ళపూడి (హైదరాబద్), చిత్రకారుడు అరసవల్లి గిరిధర్ (విజయవాడ), కార్టూనిస్టు హరి వెంకటరమణ (విశాఖపట్టణం) లకి బాపు స్మారక పురస్కారాలను అందజేశారు. అనంతరం పురస్కార గ్రహీతలు తమ స్పందనను తెలియజేస్తూ బాపు గారితో వున్న అనుబంధాన్ని గుర్తు చేసుకున్నారు.
–కలిమిశ్రీ

Bapu memorial award receiving film director Mullapudi Vara at Gutuntur
