తెలంగాణ ప్రభుత్వం ప్రతి ఏటా ప్రతిష్టాత్మకంగా ప్రదానం చేసే ‘మహాకవి దాశరథి పురస్కారం’ ఈ ఏడాది సీనియర్ పాత్రికేయులు, రచయిత, విమర్శకులు శ్రీ గుడిపాటికి దక్కింది. మహాకవి దాశరథి జయంతిని పురస్కరించుకుని (జులై 22న) రవీంద్రభారతిలో జరిగే అధికారిక వేడుకల్లో రాష్ట్ర ప్రభుత్వం ఈ పురస్కారాన్ని ప్రదానం చేయనుంది. ఈ పురస్కారం కింద ఆయనకు జ్ఞాపిక, ప్రశంసాపత్రంతో పాటు రూ. 1,01,116 నగదు బహుమతి అందజేసి సత్కరిస్తారు.

ఎంపిక కమిటీ: ఈ అవార్డు గ్రహీత ఎంపిక కోసం రాష్ట్ర ప్రభుత్వం ప్రతి ఏడాదీ ఒక ప్రత్యేక కమిటీని ఏర్పాటు చేస్తుంది. ఈసారి ప్రముఖ రచయిత డాక్టర్ అమ్మంగి వేణుగోపాల్ అధ్యక్షతన ఈ కమిటీని నియమించారు. ఇందులో రచయిత డా. సుంకిరెడ్డి నారాయణరెడ్డి, కవి జయరాజు, కవి డా. యాకూబ్, కవయిత్రి నెల్లుట్ల రమాదేవి, సాంస్కృతిక శాఖ డైరెక్టర్ డా. ఏనుగు నరసింహారెడ్డి సభ్యులుగా వ్యవహరించారు.

పాత్రికేయ ప్రస్థానం: గుడిపాటి పూర్తి పేరు గుడిపాటి వెంకటేశ్వర్లు. అయినప్పటికీ, సాహిత్య రంగంలో ఆయన ‘గుడిపాటి’గానే సుపరిచితులు. సూర్యాపేటకు చెందిన ఆయన ఉస్మానియా విశ్వవిద్యాలయం ఆర్ట్స్ కళాశాలలో రాజనీతి శాస్త్రంలో ఎం.ఏ పూర్తి చేశారు. అనంతరం బీసీజే, బీఈడీ కూడా చదివారు. తొలుత లెక్చరర్ కావాలనుకున్న ఆయన, చదువుకునే రోజుల నుంచే వివిధ పత్రికల్లో పనిచేస్తూ తన ప్రత్యేకతను చాటుకున్నారు. కొన్నాళ్ల పాటు సాయంకాలం పత్రికల్లో, అలాగే లెక్చరర్‌గా విధులు నిర్వర్తించి, ఆ తర్వాత పూర్తిస్థాయి పాత్రికేయుడిగా స్థిరపడ్డారు.

‘ఆంధ్రజ్యోతి’లో సబ్-ఎడిటర్‌గా, ‘వార్త’ సండే (ఆదివారం) అనుబంధానికి ఇన్‌ఛార్జ్‌గా, ‘నవ తెలంగాణ’ సోపతి ఇన్‌ఛార్జ్‌గా సుదీర్ఘకాలం పనిచేశారు. పత్రికల్లో ఫీచర్స్ జర్నలిజంలో ఆయన అనేక కొత్త ధోరణులను ప్రవేశపెట్టారు. వివిధ కలం పేర్లతో ఎన్నో విశ్లేషణాత్మక వ్యాసాలు రాశారు. ప్రస్తుతం ‘పాలపిట్ట’ మాసపత్రిక ఎడిటర్‌గా, పాలపిట్ట బుక్స్ ప్రచురణకర్తగా బాధ్యతలు నిర్వర్తిస్తున్నారు.

సాహిత్య సేవ: గుడిపాటి మనిషి ఎంత సౌమ్యంగా ఉంటారో, ఆయన రాతలు అంత సూటిగా, లోతైన విశ్లేషణలతో ఉంటాయి. ఎక్కడా రాజీపడని రచనలతో ఆయన ప్రత్యేక గుర్తింపు పొందారు. ఇప్పటి వరకు తన రచనలను 13 పుస్తకాలుగా తీసుకువచ్చారు. ఆయన రచించిన ‘సంవిధానం’ (కథా విమర్శ వ్యాస సంపుటి)కి తెలుగు విశ్వవిద్యాలయం నుంచి ‘ఉత్తమ విమర్శ పురస్కారం’ లభించింది. తన సొంత రచనలనే కాకుండా, ‘పాలపిట్ట’ ద్వారా సాహిత్యంలో వివిధ రచయితలు, కవులకు సంబంధించిన 300కు పైగా పుస్తకాలను ప్రచురించి సాహిత్యానికి విశేష సేవ చేస్తున్నారు.

వ్యక్తిత్వం – ఆత్మీయత: ఇటీవలే రవీంద్రభారతిలో జరిగిన ‘ప్రజా కళలు – కవి సమ్మేళనం’లో పాల్గొని సత్కారం అందుకున్న సందర్భంగా గుడిపాటి స్పందిస్తూ.. “తెలంగాణ వచ్చాక తొలిసారిగా ప్రభుత్వ సత్కారం అందుకున్నాను. అదీ తెలంగాణ ప్రజల పన్నులోంచి నగదు స్వీకరించాను” అని ఎంతో వినమ్రంగా, బాధ్యతాయుతంగా చెప్పారు. ఆయన నిరాడంబర వ్యక్తిత్వానికి ఆ మాటలే నిదర్శనం.

ఆయన నాకు అత్యంత ఆత్మీయులు, మంచి మిత్రులు. ఆయన ‘వార్త’ సండే ఇన్‌ఛార్జ్‌గా ఉన్న సమయంలో నాతో అనేక కవర్ కథనాలు రాయించి ప్రచురించారు. మంచి మనసున్న రచయిత శ్రీ గుడిపాటి గారికి ప్రతిష్టాత్మక దాశరథి పురస్కారం దక్కడం ఎంతో సంతోషకరం. వారికి నా హృదయపూర్వక శుభాకాంక్షలు.

–డా. మహ్మద్ రఫీ