విలువలకు కట్టుబడిన అక్షర సైనికుడు- వల్లీశ్వర్

సుప్రసిద్ధ సీనియర్ జర్నలిస్ట్ గుండు వల్లీశ్వర్‌కు ‘గోరాశాస్త్రి ఉత్తమ పాత్రికేయ పురస్కారం’ ప్రదానం

పాత్రికేయ వృత్తిలో నిబద్ధత, విలువలు, నిర్భయత్వం మృగ్యమవుతున్న నేటి తరుణంలో… ఒకనాటి పత్రికా దిగ్గజం గోరాశాస్త్రి పేరుమీద, నిస్వార్థంగా సేవలందించిన మరో సీనియర్ జర్నలిస్ట్ సత్కారం అందుకోవడం అక్షర లోకానికి ఒక పండుగ. సుప్రసిద్ధ సీనియర్ సంపాదకులు గోవిందుని రామశాస్త్రి (గోరాశాస్త్రి) పేరిట ఏర్పాటు చేసిన ‘ఉత్తమ పాత్రికేయ పురస్కారాన్ని’ ప్రముఖ సీనియర్ జర్నలిస్ట్ శ్రీ గుండు వల్లీశ్వర్ దంపతులకు ఘనంగా ప్రదానం చేశారు.

అపురూప వేడుక – ఆత్మీయ సత్కారం
నవసాహితీ ఇంటర్నేషనల్, వర్కింగ్ జర్నలిస్ట్స్ ఆఫ్ ఇండియా (తెలంగాణ) సంయుక్త ఆధ్వర్యంలో మే 23వ తేదీ (శనివారం) సాయంత్రం హైదరాబాద్‌లోని ఫిల్మ్ నగర్ కల్చరల్ సెంటర్‌లో ఈ వేడుక కనుల పండువగా జరిగింది. భారత పూర్వ ఉపరాష్ట్రపతి శ్రీ ఎం. వెంకయ్య నాయుడు ముఖ్యఅతిథిగా విచ్చేసి శ్రీ గుండు వల్లీశ్వర్ దంపతులకు ఈ ప్రతిష్టాత్మక పురస్కారాన్ని ప్రదానం చేసి, సత్కరించారు.

నాటి సంపాదకీయం ఓ మార్గదర్శకం : ఎం. వెంకయ్యనాయుడు
ఈ సందర్భంగా ఎం. వెంకయ్య నాయుడు మాట్లాడుతూ గోరాశాస్త్రితో తనకున్న అనుబంధాన్ని, ఆయన రచనల పట్ల తనకున్న అభిమానాన్ని గుర్తుచేసుకున్నారు.

గోరాశాస్త్రి శైలి: ప్రమాణాలు తగ్గకుండా చెణుకులు విసిరే ఆయన రచనా శైలి అద్భుతం. ప్రతిరోజు ఒక పరీక్షకు కూర్చున్నట్లుగా ఆయన సంపాదకీయం రాసేవారు. వేలాది మంది పాఠకులు చదివి తనకు మార్కులు వేస్తారని భావించి బాధ్యతగా వ్యవహరించేవారు. ముఖ్యంగా ఎమర్జన్సీ సమయంలో ఆయన రచనలు ఎంతో ప్రత్యేకతను సంతరించుకున్నాయి.

నేటి పత్రికల తీరుపై ఆవేదన: గతంలో పేదరిక నిర్మూలన దిశగా పత్రికలు కృషి చేసేవి. కానీ ప్రస్తుతం జర్నలిజంలో ప్రమాణాలు పడిపోయాయి. నిజాన్ని నిర్భయంగా రాసినా ప్రచురించే వారు కరువయ్యారు. పత్రికలు కొంచెం వంగమంటే పూర్తిగా లొంగిపోతున్నాయి. వార్తలను బ్రేక్ చేయాలనే తొందరలో సంచలనాలకు కేంద్రమై, సత్యాలకు దూరమవుతున్నాయి.

జర్నలిస్టులకు సూచన: పత్రికలు అగ్గిని రాజేయకూడదు, ఆర్పడానికి ప్రయత్నించాలి. ఏ రంగంలో ఉన్నా జాతీయ భావం ఉండాలి. ఎవరి పని వారు నిబద్ధతతో చేసుకోవడమే నిజమైన దేశభక్తి. విలువలు, ప్రతిభ కలిగిన మనసున్న మనిషి వల్లీశ్వర్ లాంటి వారిని నేటి తరం ఆదర్శంగా తీసుకోవాలి.

ఈ వేదికపై గోరాశాస్త్రి అల్లుడు శ్రీనివాస్ వాసుదేవ రచించిన ‘జాతర’ పుస్తకాన్ని ఎం.వెంకయ్య నాయుడు ఆవిష్కరించారు.

‘యాంటీ’ కే యాంటీ గోరాశాస్త్రి : సుద్దాల అశోక్ తేజ:
సభాధ్యక్షత వహించిన డా. కె.వి. రమణాచారి మాట్లాడుతూ… నిరాడంబరంగా, నిస్వార్థంగా సేవలందించిన పాత్రికేయులను సమాజం ఎల్లప్పుడూ గుర్తుంచుకోవాలన్నారు. గోరాశాస్త్రి చూపిన మార్గంలోనే వల్లీశ్వర్ నిబద్ధతతో జీవించారని కొనియాడారు.

విశిష్ట అతిథి, ప్రముఖ సినీ గేయ రచయిత సుద్దాల అశోక్ తేజ ప్రసంగిస్తూ… “గోరాశాస్త్రి గారు ఒక్కోసారి సాంప్రదాయవాదిగా, ఇంకోసారి సాంప్రదాయ విరోధిగా కనిపిస్తారు. ఆయన ఏ ఒరలోనూ ఇమడని ఓ పదునైన ఖడ్గం లాంటివారు. ఆయన నిజమైన తెలుగు స్వతంత్రుడు. ఒక్కమాటలో చెప్పాలంటే ఆయన ‘యాంటీ’ కే యాంటీ” అని చమత్కరించారు.

జర్నలిజంలోనే అసలైన ‘కిక్’ ఉంది : గుండు వల్లీశ్వర్:
పురస్కార గ్రహీత జి. వల్లీశ్వర్ తన ప్రసంగంలో వృత్తి పట్ల తనకున్న అంకితభావాన్ని వివరించారు.

“మహానుభావులు గోరాశాస్త్రి గారి అవార్డు అందుకోవడం నా పూర్వజన్మ సుకృతం. ఏ అర్ధరాత్రికో ఇంటికి చేరే మేం ఒకరకంగా శాపగ్రస్తులం. సమాజంలో పాత్రికేయులు న్యాయమూర్తిలా, ఉపాధ్యాయుడిలా, అర్చకుడిలా నిష్పక్షపాతంగా, పవిత్రంగా ఉండాలని నా గురువుగారు చెప్పారు. ఆ సూత్రాన్నే నేను నమ్ముకున్నాను. అదే నా విజయ రహస్యం. 25 ఏళ్ల పాటు నా భార్యతో కలసి ప్రశాంతంగా ఓ సినిమా కూడా చూడలేకపోయాను. వృత్తిలో ఎన్నో సాహసాలు చేశాను, ఒత్తిళ్లు భరించాను. తప్పును తప్పు అనే రాశాను. ఒకసారి తప్పు చేస్తే ఉరి తీయమని రామోజీరావు గారికి సైతం ఉత్తరం రాశాను. పాత్రికేయ జీవితంలో నేను కుటుంబ జీవితాన్ని మిస్ అయినా… ఈ వృత్తి నాకు అంతులేని ఆనందాన్ని, మంచి ‘కిక్’ ను ఇచ్చింది.”

1972 డిసెంబర్‌లో ఏలూరులో వెంకయ్య నాయుడు విద్యార్థి నాయకుడిగా ఏర్పాటు చేసిన సభ ద్వారానే తన పొలిటికల్ రిపోర్టింగ్ ప్రారంభమైందని వల్లీశ్వర్ గుర్తుచేసుకున్నారు.

కుటుంబ సభ్యుల ఆత్మీయ పలకరింపు:
నాన్నగారి మాటే నా ఎదుగుదలకు కారణం (జి. రాజా కార్తికేయ, కుమారుడు – ఐక్యరాజ్యసమితి దౌత్యవేత్త): “నేను దౌత్యవేత్తగా రాణించడం వెనుక నాన్నగారి స్ఫూర్తి ఉంది. ‘నువ్వు కరెక్ట్ కానీ అతను రాంగ్ కాదు’ అని ఆయన చెప్పిన మాట నాకు జీవితంలో ఎంతో ఉపయోగపడింది. ఓర్పు, ఎదుటివారి మాట వినడం ఆయన నుంచే నేర్చుకున్నాను.”

ఆరోజు వదిలేసి ఉంటే ఇన్ని అవార్డులు వచ్చేవా? (లలిత కుమారి, భార్య): “అప్పట్లో ఆయనకు తిరుపతి బదిలీ అయ్యింది. నేను ఇద్దరు చంటి పిల్లల తల్లిని. దిగిన కొత్త ఇంట్లో మమ్మల్ని వదిలేసి ఆఫీస్‌కి వెళ్లి ఏ అర్ధరాత్రికో వచ్చేవారు. ఆయనకు నేనంటే ప్రాణమే, కానీ నాకన్నా ఆఫీస్ అంటే ఇంకా ప్రాణం. ఆ రోజుల్లో ఆయన్ని వదిలేసి ఏలూరు వెళ్ళిపోవాలనుకున్నాను. ఒకవేళ అలా వదిలేసి ఉంటే ఇవాళ ఇన్ని అవార్డులు వచ్చేవా? అప్పట్లో పిల్లలు తండ్రిని చూడలేక ఫోటో జేబులో పెట్టుకుని తిరిగేవారు. నేను పడిన కష్టాలకు ఆయనకు గొప్ప పేరు రావడం సంతోషంగా ఉంది” అంటూ ఆమె చేసిన ప్రసంగం సభికుల్లో నవ్వులు పూయించింది.

సభలో పాల్గొన్న ప్రముఖులు:
ఈ కార్యక్రమంలో వరంగల్ చండీ పరమేశ్వరి పీఠాధిపతి బ్రహ్మర్షి అవసరాల ప్రసాద్ శర్మ సిద్ధాంతి, డా. గోవిందరాజుల చక్రధర్, ఎమెస్కో విజయకుమార్, మాశర్మ, రావికంటి శ్రీనివాస్, సి. కేశవులు తదితరులు ప్రసంగించారు. నవసాహితి ఎస్. వి. సూర్యప్రకాశరావు, ఝాన్సీ రాపర్తి కార్యక్రమాన్ని సమన్వయం చేశారు.

సభలో బిజెపి నేత కె. గీతామూర్తి, సీనియర్ పాత్రికేయులు టి.ఉడయవర్లు, నందిరాజు రాధాకృష్ణ, కొండా లక్ష్మణరావు, వి.విజయసారధి, దోర్బల బాలశేఖరశర్మ, వడ్డి ఓంప్రకాష్, రెంటాల జయదేవ్, పురాణపండ జయంతి, అక్కినేని శ్రీధర్, గాయని జ్యోతిర్మయి, శ్రీప్రద, రాజేశ్వరి, డి.జ్యోతిరెడ్డి తదితర ప్రముఖులు పాల్గొన్నారు.

Share via
Copy link
Powered by Social Snap