ఫోటో/వీడియో జర్నలిస్టులు మీడియాలో అసమాన్య ప్రతిభావంతులు.

డిజిటల్ యుగంలో జర్నలిజం వేగంగా మారుతోంది. ఒకప్పుడు వార్తలను చదివే పాఠకులు ఎక్కువగా ఉండేవారు. తరువాత టెలివిజన్ యుగం వచ్చింది. ఇప్పుడు మొబైల్ ఫోన్ చేతిలో ఉండటంతో ప్రజలు వార్తలను ఎక్కువగా వీడియో రూపంలో చూడటానికి ఆసక్తి చూపుతున్నారు. ఈ మార్పుతో జర్నలిజంలో వీడియో జర్నలిస్టుల పాత్ర మరింత కీలకంగా మారింది. నేటి పరిస్థితుల్లో ఒక వీడియో జర్నలిస్టు కేవలం కెమెరా ఆపరేటర్ కాదు.అతడు రిపోర్టర్, కథకుడు, ఎడిటర్, దర్శకుడు, కొన్నిసార్లు యాంకర్ కూడా. ఒక సంఘటనను ప్రజల కళ్ల ముందుకు తీసుకురావడంలో అతని పాత్ర అత్యంత కీలకం. అందుకే వీడియో జర్నలిజంలో రాణించాలంటే కేవలం సాంకేతిక నైపుణ్యాలు సరిపోవు. సామాజిక అవగాహన, వార్తా విలువలపై పట్టు, కథ చెప్పే సామర్థ్యం కూడా అవసరం.

వార్తను చూడగలిగే దృష్టి మొదటి అర్హత:
వీడియో జర్నలిస్టుగా ఎదగాలంటే ముందుగా వార్తను గుర్తించే దృష్టి ఉండాలి.ప్రతి సంఘటనలో వార్తా విలువ ఏమిటి? ప్రజలపై దాని ప్రభావం ఎంత? అనే అంశాలను అర్థం చేసుకోవాలి. కెమెరా ముందు కనిపించే దృశ్యం కంటే దాని వెనుక ఉన్న కథను గుర్తించగలిగిన వ్యక్తే గొప్ప ఫోటో/వీడియో జర్నలిస్టు అవుతాడు. ఒక రైతు పొలంలో నిలబడి ఉండటం ఒక దృశ్యం మాత్రమే. కానీ అతని కష్టాలు, ఆశలు, సమస్యలు, విజయాలు కథగా మారినప్పుడు అది ప్రజలను కదిలించే జర్నలిజం అవుతుంది. కెమెరా భాషపై పట్టు సాధించాలి. రచయితకు పదాలు ఎంత ముఖ్యమో, వీడియో జర్నలిస్టుకు దృశ్యాలు అంత ముఖ్యమైనవి. అందుకే కెమెరా యాంగిల్స్, ఫ్రేమింగ్, లైటింగ్, కాంపోజిషన్ వంటి అంశాలపై అవగాహన ఉండాలి. ఏ దృశ్యాన్ని ఎలా చిత్రీకరిస్తే ఎక్కువ ప్రభావం ఉంటుందో తెలుసుకోవాలి. వైడ్ షాట్, మీడియం షాట్, క్లోజ్ షాట్, కట్ అవేస్, రియాక్షన్ షాట్స్ వంటి అంశాలను సమర్థంగా ఉపయోగించగలగాలి. మంచి విజువల్స్ లేకుండా గొప్ప కథ కూడా ప్రేక్షకుడిని ఆకట్టుకోలేదు. అదే సరైన విజువల్స్ ఉంటే సాధారణ కథ కూడా బలమైన ప్రభావాన్ని చూపుతుంది.

కథ చెప్పే కళ నేర్చుకోవాలి:
వీడియో జర్నలిజంలో ప్రధానమైనది స్టోరీ టెల్లింగ్.ఒక సంఘటనను కేవలం చూపించడం కాదు, ప్రేక్షకుడు ఆ కథతో అనుసంధానం అయ్యేలా చెప్పడం ముఖ్యం. ప్రారంభం నుంచి ముగింపు వరకు కథలో ఒక ప్రవాహం ఉండాలి. సమస్య ఏమిటి? దాని ప్రభావం ఏమిటి? పరిష్కారం ఏమిటి? అనే అంశాలను దృశ్యాలు, ఇంటర్వ్యూలు, నేరేషన్ ద్వారా సమన్వయం చేయాలి. మంచి వీడియో/ఫోటో జర్నలిస్టు ప్రేక్షకుడిని కేవలం సమాచారంతో నింపడు. ఆలోచింపజేస్తాడు. స్పందించేలా చేస్తాడు.

ఎడిటింగ్‌పై పట్టు అత్యవసరం:
చిత్రీకరణ ఎంత ముఖ్యమో ఎడిటింగ్ కూడా అంతే ముఖ్యం. మంచి ఎడిటింగ్ ఒక సాధారణ వీడియోను అసాధారణ కథగా మార్చగలదు. ప్రస్తుత కాలంలో ఏడాబ్ ప్రీమియర్ ప్రో, డావిన్సీ రెసొల్వె, ఫైనల్ కట్ ప్రో వంటి ఎడిటింగ్ సాఫ్ట్‌వేర్‌లపై అవగాహన అవసరం. షాట్ల ఎంపిక, సౌండ్ సింక్, గ్రాఫిక్స్, టైటిల్స్, మ్యూజిక్ వినియోగం వంటి అంశాలపై పట్టు సాధించాలి. ఎడిటింగ్ అనేది కేవలం దృశ్యాలను కత్తిరించడం కాదు. కథకు ప్రాణం పోయడం.

మొబైల్ జర్నలిజం(మోజో)లో నైపుణ్యం అవసరం:
నేడు అనేక పెద్ద మీడియా సంస్థలు కూడా మొబైల్ జర్నలిజాన్ని ప్రోత్సహిస్తున్నాయి. ఒక మంచి స్మార్ట్‌ఫోన్‌తోనే నాణ్యమైన వీడియో కథనాలను రూపొందించే పరిస్థితి వచ్చింది. అందువల్ల మొబైల్ కెమెరా సామర్థ్యాలు, ఆడియో రికార్డింగ్, లైవ్ స్ట్రీమింగ్, మొబైల్ ఎడిటింగ్ యాప్‌ల వినియోగంపై అవగాహన పెంచుకోవాలి. భవిష్యత్తు జర్నలిజంలో మొబైల్ జర్నలిస్టుల పాత్ర మరింత పెరగబోతోంది.

వాస్తవాల నిర్ధారణలో రాజీ ఉండకూడదు:
వేగం కోసం నిజాలను త్యాగం చేయకూడదు. సోషల్ మీడియా కాలంలో ఫేక్ వీడియోలు, తప్పుదారి పట్టించే క్లిప్‌లు వేగంగా వ్యాపిస్తున్నాయి. వీడియో జర్నలిస్టు ప్రతి సమాచారాన్ని ధృవీకరించాలి. వీడియో ఎక్కడిది? ఎప్పుడు చిత్రీకరించారు? సందర్భం ఏమిటి? అనే విషయాలను నిర్ధారించుకోవాలి. నిజాయితీ, విశ్వసనీయత, నైతిక విలువలే జర్నలిస్టు అసలు బలం.

మానవీయ కోణాన్ని గుర్తించాలి:
ప్రతి వార్త వెనుక మనుషులు ఉంటారు. వారి భావోద్వేగాలు, సమస్యలు, ఆశలు, బాధలు ఉంటాయి. వాటిని సున్నితంగా, గౌరవంగా చూపించడం వీడియో జర్నలిస్టు బాధ్యత. ప్రమాదాలు, విపత్తులు, విషాద సంఘటనలను చిత్రీకరించే సమయంలో బాధితుల గౌరవాన్ని కాపాడాలి. సంచలనాల కోసం మానవత్వాన్ని తాకట్టు పెట్టకూడదు. నిరంతర అధ్యయనం తప్పనిసరి సాంకేతికత రోజురోజుకూ మారుతోంది. కొత్త కెమెరాలు, డ్రోన్లు, ఎడిటింగ్ టూల్స్, ఆర్టిఫిషియల్ ఇంటెలిజెన్స్ ఆధారిత సాంకేతికతలు వస్తున్నాయి.అందువల్ల వీడియో జర్నలిస్టు ఎప్పటికప్పుడు కొత్త విషయాలు నేర్చుకుంటూ ఉండాలి. ప్రపంచవ్యాప్తంగా రూపొందుతున్న ఉత్తమ డాక్యుమెంటరీలు, న్యూస్ ఫీచర్లు, డిజిటల్ కథనాలను అధ్యయనం చేయాలి.నేర్చుకోవడం ఆపిన రోజు ఎదుగుదల ఆగిపోతుంది.

సోషల్ మీడియా యుగంలో కొత్త అవకాశాలు:
ఒకప్పుడు టెలివిజన్ ఛానళ్లే వీడియోలకు ప్రధాన వేదిక. ఇప్పుడు యూట్యూబ్, ఫేస్‌బుక్, ఇన్‌స్టాగ్రామ్, ఎక్స్ వంటి వేదికలు వీడియో జర్నలిస్టులకు అపార అవకాశాలు కల్పిస్తు న్నాయి. స్వతంత్రంగా కూడా కథనాలు రూపొందించి లక్షలాది మంది ప్రేక్షకులను చేరుకునే అవకాశం ఉంది. అయితే వీక్షణల కోసం నాణ్యతను, నైతిక విలువలను కోల్పోవద్దు.

మొత్తంమీదుట వీడియో జర్నలిజం అనేది కెమెరా నైపుణ్యం మాత్రమే కాదు.అది పరిశోధన, పరిశీలన, సృజనాత్మకత, సాంకేతికత, సామా జిక బాధ్యతల సమ్మేళనం. ఒక గొప్ప వీడియో జర్నలిస్టు సంఘటనలను కేవలం చిత్రీకరించడు, సమాజం చూడని కోణాలను వెలికితీసి ప్రజల ముందుంచుతాడు. ప్రజల జీవితాలను అర్థం చేసుకుంటూ, నిజాలను వెతుకుతూ, దృశ్యాల ద్వారా ప్రభావ వంతమైన కథలు చెప్పగలిగిన వారే ఈ రంగంలో దీర్ఘకాలం రాణిస్తారు. కెమెరా చేతిలో ఉండటం ఒక అవకాశం మాత్రమే. దాన్ని ప్రజా ప్రయోజనానికి ఉపయోగించడం నిజమైన వీడియో జర్నలిస్టు విజయానికి కొలమానం.

ఈపూరి రాజారత్నం,
సీనియర్ జర్నలిస్ట్ (9390062078)