హస్తకళాకారులకు గ్లోబల్ గుర్తింపు దక్కడమే ప్రభుత్వ లక్ష్యం
‘హస్తకళల మహోత్సవం’ను ఘనంగా ప్రారంభించిన ఉపముఖ్యమంత్రి పవన్ కళ్యాణ్

ఎకో టూరిజం, టెంపుల్ టూరిజం తరహాలో రాష్ట్రంలో ‘హస్తకళల పర్యాటకాన్ని’ అభివృద్ధి చేయడానికి ప్రభుత్వం కట్టుబడి ఉందని రాష్ట్ర ఉపముఖ్యమంత్రి శ్రీ పవన్ కళ్యాణ్ ఉద్ఘాటించారు. హస్తకళాకారుల నైపుణ్యాన్ని, కష్టాన్ని ప్రపంచానికి చాటిచెబుతూ.. వారికి తగిన గుర్తింపు కల్పించే దిశగా అడుగులు వేస్తున్నామని ఆయన స్పష్టం చేశారు.

జులై 07న విజయవాడలోని డాక్టర్ బి.ఆర్. అంబేద్కర్ కళావేదికలో ఆంధ్రప్రదేశ్ హస్తకళల అభివృద్ధి సంస్థ (లేపాక్షి) ఆధ్వర్యంలో నిర్వహించిన ‘ఆంధ్రప్రదేశ్ హస్తకళల మహోత్సవం-2024’ను ఆయన లాంఛనంగా ప్రారంభించారు. ఈ ప్రదర్శనలో రాష్ట్ర నలుమూలల నుంచి వచ్చిన ప్రతిభావంతులైన హస్తకళాకారులు తమ అద్భుతమైన కళాఖండాలను ప్రదర్శించారు.

కళాకారుల అభ్యున్నతికి ప్రభుత్వ చర్యలు: ఈ వేదికగా ఉపముఖ్యమంత్రి పవన్ కళ్యాణ్ కళాకారుల సంక్షేమం కోసం పలు కీలక నిర్ణయాలను వెల్లడించారు:

డిజిటల్ గుర్తింపు: ప్రతి కళాకృతిపై క్యూఆర్ (QR) కోడ్ అమర్చి, దాన్ని స్కాన్ చేయగానే ఆ వస్తువును తయారు చేసిన కళాకారుడి పూర్తి వివరాలు తెలిసేలా చర్యలు తీసుకుంటారు.

అంతర్జాతీయ ప్రచారం: కళాకారుల జీవనశైలి, వారి నైపుణ్యాలపై ప్రత్యేక డాక్యుమెంటరీలు రూపొందించి, అంతర్జాతీయ స్థాయిలో ప్రచారం కల్పిస్తారు.

పీఎం విశ్వకర్మ పథకం: ఈ పథకం కింద క్లస్టర్ల వారీగా కామన్ ఫెసిలిటీ సెంటర్లను (సాధారణ వసతి కేంద్రాలు) ఏర్పాటు చేస్తారు.

ఆరోగ్య భద్రత: కళాకారుల ఆరోగ్య పరిరక్షణ నిమిత్తం క్లస్టర్ల వారీగా ప్రత్యేక వైద్య శిబిరాలు నిర్వహించాలని అధికారులను ఆదేశించారు.

కళాకారులతో మమేకం… కళలకు పట్టాభిషేకం: మహోత్సవంలో ఏర్పాటు చేసిన వివిధ స్టాల్స్‌ను పవన్ కళ్యాణ్ ఆసక్తిగా సందర్శించారు. ఉప్పాడ జామదానీ చీరలు, శ్రీకాళహస్తి కలంకారీ వస్త్రాలు, తిరుపతి వుడ్ కార్వింగ్, నరసాపురం లేస్ వంటి సుప్రసిద్ధ కళాఖండాలను ఆయన నిశితంగా పరిశీలించి, కళాకారులతో ముచ్చటించారు. వారి సాధకబాధకాలను స్వయంగా అడిగి తెలుసుకున్న ఆయన, అవసరమైన సౌకర్యాల కల్పనపై అధికారులకు అక్కడికక్కడే దిశానిర్దేశం చేశారు. తన సతీమణి శ్రీమతి అన్నా కొణిదెల గారి కోసం ఉప్పాడ చీరలను కొనుగోలు చేసి చేనేతపై తనకున్న అభిమానాన్ని చాటుకున్నారు.

గోదావరి పుష్కరాల్లో తోలుబొమ్మలాట: తోలుబొమ్మలాట కళాకారులు ప్రదర్శించిన రామాయణంలోని ‘రావణ సంహార’ ఘట్టాన్ని పవన్ కళ్యాణ్ ఆసాంతం తిలకించి వారిని ప్రశంసించారు. రాబోయే గోదావరి పుష్కరాల్లో తోలుబొమ్మలాట కళాకారులకు ప్రత్యేక ప్రదర్శనలు ఏర్పాటు చేసేలా చర్యలు తీసుకుంటామని హామీ ఇచ్చారు. జపాన్ దేశం తమ కళాకారులను గౌరవించే తరహాలోనే, మన హస్తకళలకు అంతర్జాతీయ స్థాయి గుర్తింపు తీసుకురావాలని ఈ సందర్భంగా ఆయన ఆకాంక్షించారు.

‘లేపాక్షి ఈ-కామర్స్’ యాప్ ఆవిష్కరణ: రాష్ట్ర హస్తకళల ఉత్పత్తులకు గ్లోబల్ మార్కెట్ అవకాశాలను విస్తరించే లక్ష్యంతో ‘లేపాక్షి ఈ-కామర్స్ యాప్‌’ను ఉపముఖ్యమంత్రి ఆవిష్కరించారు. అలాగే వివిధ క్లస్టర్లలో 100 ఉద్యమ్ వర్క్‌షాపులను లాంఛనంగా ప్రారంభించారు.

ఈ ప్రతిష్టాత్మక కార్యక్రమంలో రాష్ట్ర బీసీ సంక్షేమ, చేనేత, జౌళి, వస్త్ర పరిశ్రమల శాఖ మంత్రి శ్రీమతి ఎస్. సవిత, విజయవాడ ఎంపీ కేశినేని శివనాథ్, హస్తకళల అభివృద్ధి సంస్థ చైర్మన్ డాక్టర్ పసుపులేటి హరిప్రసాద్ తదితర ప్రముఖులు పాల్గొన్నారు. హస్తకళల పరిరక్షణను కూటమి ప్రభుత్వం తమ బాధ్యతగా తీసుకుంటుందని ఈ సందర్భంగా నాయకులు స్పష్టం చేశారు.

-కళసాగర్ యల్లపు